Shairi: Agosti kumi ya Simba

Leo twendeni mbugani, utalii mbuga zetu
Huko leo kuna nini, nataka ninene kitu
Leo huko duniani, siku ya bingwa wa mwitu
Agosti kumi ya Simba, ni jukumu tuwatunze

Simba ni bingwa wa mwitu, hakuna asiyejua
Anaogopwa na watu, na mbio wakatimua
Mnyama ni mthubutu, mwendo wake wa hatua
Agosti kumi ya Simba, ni jukumu tuwalinde

Simba huyu maarufu, kivutio duniani
Ila twaingia hofu, wachache wasothamini
Ni watu waharibifu, wawawindao porini
Agosti kumi ya Simba, ni jukumu tuwatunze

Tudhibiti majangili, waletao maumivu
Tuwe na moja kauli, na pamoja zetu nguvu
Mbinu zote mbalimbali, dhidi ya wa nia ovu
Agosti kumi ya Simba, ni jukumu tuwalinde

Tusifunge yetu macho, kila mara tuwalinde
Hadi kizazi kijacho, watusifu watupende
Kuwa tulikuwa jicho, wasituponde ponde
Agosti kumi ya Simba, ni jukumu tuwatunze

Siku hii ya Simba, tulinde hii zawadi
Hata simba mwenye mimba, alindwe tena zaidi
Kutolinda ni kuchimba, shimo letu makusudi
Agosti kumi ya Simba, ni jukumu tuwatunze

Kuwatunza ni muhimu, kivutio cha wageni
Tuwalinde zamu zamu, pato lisishuke chini
Wakiwa hawa adimu, tutapotea sokoni
Agosti kumi ya Simba, ni jukumu tuwalinde

Malenga wa Ubena
+255 676 559 211
Uhifadhi
Wildlife Tanzania